Ndërroi emrin 15 herë, lirohet shqiptari që u dënua me 108 vjet burg

Tashmë ai banon në Greqi dhe është në pritje të shqyrtimit të aplikimit të tij për azil

Një 36-vjeçar shqiptar ka përdorur emrin 15 emra, dhe ishte dënuar nga gjykata greke me 108.5 vite burg për disa akuza, atë të krijimit të një organizate kriminale, vrasje, vjedhje në bashkëpunim e armëmbajtje pa leje. Megjithatë, ai u lirua nga burgu vetëm pas 8 vite e gjysmë, shkruajnë mediat shqiptare.

Kjo çështje ka bërë bujë edhe në mediat greke. “Protothema” shkruan se shqiptari ka përfituar nga ligji famëkeq “Paraskevopoulos”, i cili i lejon të dënuarit që të aplikojnë për azil dhe në këtë mënyrë nuk dëbohen nga vendi. Gjithashtu, ky ligj ka reduktuar dënimin e detyrueshëm të vuajtjes së dënimit, nga 3/5 në 2/5, përcjell albinfo.ch.

Sipas informacioneve të “Protothema”, shqiptari u lirua me kusht në nëntor të vitit 2016 pasi iu llogaritën edhe 413 ditët e punës vullnetare.

Tashmë ai banon në Greqi dhe është në pritje të shqyrtimit të aplikimit të tij për azil. Sikurse shkruan e përditshmja greke, lirimi i shqiptarit, emrin e të cilit ka zgjedhur mos ta publikojë, është vetëm një nga disa rastet.