Në Berlin protestohet për rritjen e qirasë

Nga 1.9 milion shtëpi me qira të përballueshme që mungojnë në Gjermani, 310.000 janë në Berlin

Keystone

Berlini po shënon rritjet më të larta të çmimeve të pasurive të paluajtshme në botë, thuhet në një raport të botuar këtë javë.

Sipas një studimi nga firma për pasuritë e paluajtshme Knight Frank vetëm në vitin 2017 çmimet në Berlin u rritën me 20.5 për qind.

“Indeksi i qyteteve rezidenciale globale” të kësaj firme tregon se ndërsa vitet e fundit në mbarë botën çmimet e banesave ranë, Berlini është një nga vetëm 12 qytetet që kishin një rritje të çmimeve prej mbi 20 për qind në vitin 2016, shkruan “DW”.

Prandaj mijëra njerëz protestuan në kryeqytetin gjerman ndaj rritjes së kostove të strehimit dhe gentrifikimit të shfrenuar të lagjeve të qytetit. Gentrifikimi është procesi i modernizimit të lagjeve tradicionale që shoqërohet edhe me ngritjen e çmimeve të qirave, gjë që i bën shumë prej banorëve tradicionalë që të largohen nga këto lagje, sepse nuk janë në gjendje t’i paguajnë ato, përcjell albinfo.ch.

Që nga viti 2004 çmimet në përgjithësi janë rritur me 120 për qind për shkak se papunësia e ulët dhe investimet e huaja i kanë dhënë nxitje qytetit. Megjithatë, Banka Federale e Gjermanisë mendon se në Berlin vlerat e pronave janë mbivlerësuar me rreth 35 për qind. Nga 1.9 milion shtëpi me qira të përballueshme që mungojnë në Gjermani, 310.000 janë në Berlin.