Në Bernë u mbajt eventi “Kostumet Popullore, Identitet Kombëtar”

Gjatë fundjavës, më 25 prill 2026, në ambientet e Kongresszentrum Allresto në Bernë, u zhvillua eventi kulturor “Kostumet Popullore, Identitet Kombëtar”, i organizuar nga Flora Style nën drejtimin e Flora Balaj, duke mbledhur pjesëtarë të diasporës, artistë dhe dashamirës të kulturës shqiptare në një mbrëmje me domethënie të veçantë kulturore.

Programi solli para publikut kostume popullore shqiptare nga treva të ndryshme. Prezantimi vuri në pah larminë e tyre dhe vlerat e trashëgimisë kulturore kombëtare. Kostumi tradicional u trajtua si element i identitetit dhe si pjesë e kujtesës kulturore në diasporë.

Në këtë mbrëmje, kostumografia shqiptare u shfaq si një fushë e strukturuar e trashëgimisë shpirtërore dhe materiale. Në të u evidentuan shtresime historike, forma të organizimit shoqëror dhe zhvillime kulturore të ruajtura ndër shekuj. Çdo kostum paraqiti veçori të qarta krahinore përmes prerjes, materialit, ngjyrave dhe ornamenteve. Këto elemente artikulojnë përkatësinë, statusin dhe traditën lokale. Prezantimi i tyre në aktivitete të këtij karakteri shërben për dokumentimin dhe transmetimin e kësaj pasurie kulturore te brezat e rinj.

Në kuadër të programit u shfaq dokumentari “Sfilatë e Kostumeve Shqiptare në Zvicër”, me regji të Llesh Nikollës, i cili trajton përpjekjet për ruajtjen dhe promovimin e trashëgimisë kulturore shqiptare jashtë atdheut. U prezantuan gjithashtu dizajne të reja nga Flora Balaj, ndërsa komente profesionale u dhanë nga Prof. Zymer Neziri.

Mbrëmja u shoqërua me program të pasur kulturor dhe artistik. Veshjet tradicionale u prezantuan edhe në forma të përpunuara bashkëkohore. U theksua vazhdimësia e traditës dhe prania e saj në kontekste të reja shprehëse.

Në aktivitet mori pjesë Ambasadori i Republikës së Shqipërisë në Bernë, Shkëlqesia e Tij z. Ermal Dredha. Ai vlerësoi rëndësinë e ruajtjes dhe promovimit të trashëgimisë kulturore shqiptare në diasporë. Ai theksoi angazhimin e organizatorëve dhe të komunitetit.

Gjatë ceremonisë u nda një mirënjohjeje për regjisorin Llesh Nikolla nga “Parlamenti Paqësor i Kombit Shqiptar”, në vlerësim të kontributit në promovimin e kulturës dhe identitetit shqiptar.

 

 

 

---