Gjermani: Kisha bëhet “xhami” për myslimanët që s’kanë ku të falen (VIDEO)

Screenshot Video Reuters

Është bërë e ditur se një kishë në Berlin është duke mirëpritur myslimanë, që nuk janë në gjendje të shkojnë në xhami për Lutjet e së Premtes, pas udhëzimeve për distancim fizik, ka raportuar agjencia e lajmeve Reuters.

Thuhet se Xhamia Dar Assalam në Neukolln zakonisht mirëpret qindra myslimanë për shërbimet e së premtes. Mirëpo tani mund të pranojë vetëm 50 persona, në kohën kur Gjermania zbaton masat e izolimit, me qëllim të luftimit të koronavirusit, shkruan REL.

Gjatë Muajit të Shenjtë të Ramazanit kisha Martha Lutheran ka ofruar ndihmë, duke u mundësuar besimtarëve myslimanë lutje në gjuhën arabe dhe gjermane.

“Është një shenjë e mirë, pasi sjell gëzim në Ramazan dhe në mesin e krizës”, ka thënë imami i xhamisë, Mohamed Taha Sabry.

“Kjo pandemi na ka bërë komunitet. Krizat i bëjnë njerëzit bashkë”, ka shtuar mes tjerash ai.

Objektet fetare janë rihapur më 4 maj në Gjermani, pas mbylljes disajavore, ndonëse edhe tani besimtarët duhet të mbajnë distancë nga njëri-tjetri prej 1.5 metrave, përcjell albinfo.ch.