Në nderim të policit të vrarë sot, nesër ditë zie në Kosovë

Në nderim të policit Afrim Bunjaku, i cili u vra orët e para të ditës së sotme në veri të Kosovës, dita e hënë do të jetë ditë zie shtetërore.

Sipas njoftimit nga Presidenca, presidentja e Kosovës Vjosa Osmani, duke u bazuar në Kushtetutën e Kosovës e ka marrë vendimin, ndërsa u tha se Protokolli do t’i ndërmarrë të gjitha veprimet.

“Presidentja e Republikës së Kosovës, Vjosa Osmani, në mbështetje të Kushtetutës së Kosovës, ka marrë vendim që dita e hënë, 25 shtator 2023, të shpallet ditë zie, shtetërore në nderim të policit Afrim Bunjaku, i vrarë në veri të vendit. Zija shtetërore do të jetë gjatë ditës së hënë, ndërkaq Protokolli i Shtetit ngarkohet që t`i ndërmarrë të gjitha veprimet e nevojshme për zbatimin e këtij vendimi”, thuhet në njoftim, përcjell albinfo.ch.