Në Shqipëri, rekord i rasteve të reja me COVID-19

Shqipëria ka shënuar 117 raste të reja dhe dy viktima nga koronavirusi në 24 orët e fundit.

Viktimat janë një 70-vjeçare nga Tirana dhe një 66-vjeçar nga Shkodra, me sëmundje bashkëshoqëruse. Në total numri i vdekjeve ka shkuar në 95 persona, shkruan albinfo.ch.

Në spitalin infektiv pacientët në gjendje të rënduar janë në numër të lartë. Aktualisht janë 85 pacientë në spital, nga të cilët 10 në terapi intensive dhe 4 prej tyre janë të intubuar, në gjendje të rëndë.

Vetë autoritetet e shëndetësisë po flasin për një situatë serioze epidemiologjike dhe po përgatiten për të rihapur spitalin ‘Shefqet Ndroqi’ në Tiranë, vetëm për të sëmurët e prekur nga koronavirusi.

“Java që lamë pas ka treguar një trend të rritur të rasteve të konfirmuara pozitive, rritje të shtrimeve në spital, pacientëve që kanë pasur nevojë për trajtim në terapi intensive, por edhe pacientë të intubuar. Fatkeqësisht kemi pasur edhe rritje të qytetarëve që kanë humbur jetën”, deklaroi sot Eugena Tomini e Institutit të Shëndetit Publik.

Përkeqësimi i situatës dëshmohet dhe nga pohimi i sotëm i autoriteteve: “Aktualisht kemi transmetim komunitar të përhapjes së virusit në disa bashki të vendit”, u shpreh Tomini.

Aktualisht janë 1462 raste aktive. Tirana mbetet zona me 635 raste, ose 43 për qind të personave ende pozitivë, e ndjekur nga Durrësi e Shkodra, me mbi 200 raste, Vlora 108, ndërsa qarqet e tjera poshtë 100 të prekurve aktivë.