Në vetëshërbim, qytetarët nxorën 1900 ekstrakte të lindjes

Vetëm brenda dy muajve, qytetarët janë shërbyer me 1.889 ekstrakte të lindjes, numër ky shumë më i lartë se të gjitha pritshmëritë e autoriteteve komunale

Qytetarët e Kosovës kanë filluar të mësohen me procedurat e reja që ka aplikuar Komuna e Prishtinës për vetëshërbim në marrjen e certifikatave të lindjes. Vetëm brenda dy muajve, qytetarët janë shërbyer me 1.889 ekstrakte të lindjes, numër ky shumë më i lartë se të gjitha pritshmëritë e autoriteteve komunale.

“Vetëshërbimi digjital për certifikatat, ekstraktet apo shërbimet e gjendjes civile është në dispozicion 24 orë në ditë, 7 ditë në javë dhe qytetarët të cilët janë të regjistruar në regjistrin civil, si dhe kanë nxjerrë edhe më parë një ekstrakt, në çfarëdo kohe përmes një procesi tejet të thjeshtë, me letërnjoftimin e tyre mund ta shtypin ekstraktin e në të ardhmen edhe certifikata të tjera”, thuhet në një njoftim të Komunës.

Ky vetëshërbim digjital, sipas tyre, do t’i ketë tre komponentë.
“E – Kiosk, aparati i cili mundëson nxjerrjen e ekstraktit të lindjes për përdorim interno, e cila tashmë është në shërbim të qytetarëve; Mundësia e shtypjes së formularëve nga cilado drejtori e Komunës së Prishtinës dhe; Dërgimi i formularëve të plotësuar drejtpërsëdrejti në mënyrë automatike në Qendrën për Shërbime me Qytetarë, shërbime këto që pritet të fillojnë brenda një periudhe të shkurtër kohore”.

Komuna e Prishtinës, siç thuhet në komunikatë, mbetet e përkushtuar në ngritjen e kapaciteteve në ofrimin e shërbimeve për qytetarë.

“Nga viti i ardhshëm këto pika të vetëshërbimeve digjitale planifikohen të vendosen në Bashkësitë Lokale, si dhe nëpër pika kyçe të qytetit të cilat janë më të frekuentuara nga qytetarët”, njofton komuna e  drejtuar nga Shpend Ahmeti.