Negociatat për emrin e Maqedonisë do të vazhdojnë në SHBA

Pas refuzimit që i bëri Greqia propozimit “Republika e Maqedonisë së Ilindenit”, si opsion për zgjidhjen e çështjes së emrit, më 24 dhe 25 maj në New York do të zhvillohen bisedime të reja mes ministrave të Punëve të Jashtme të dy vendeve, Nikos Kotzias dhe Nikolla Dimitrov, në prani të ndërmjetësit të OKB-së, Matthew Nimetz.

Lajmin e ka bërë të ditur Ministria e Jashtme e Maqedonisë, ndërsa paraprakisht një gjë e tillë ishte kumtuar edhe nga pala greke.

“Ky takim është i një rëndësie të veçantë për rrjedhën e bisedimeve. Ndoshta edhe shansi i fundit për përparimin pas dështimit të emrit ‘Maqedonia e Ilindenit’ dhe kthimin në tryezë të pesë emrave fillestarë që ishin paraqitur nga ndërmjetësi Nimetz. Gjithsesi, si variante të mundshme mbeten emrat ‘Maqedonia e Re’ dhe ‘Maqedonia e Epërme’ dhe me siguri se bisedimet do të zhvillohet rreth këtyre skenarëve të mundshëm”, shkruajnë gazetat greke, përcjell albinfo.ch.

Kryeministri grek, Alexis Tsipras, u distancua nga propozimi “Maqedonia e Ilindenit”, pasi ky emër ishte kundërshtuar nga të gjitha partitë në Greqi.