Nga 15 korriku, lejohen vizitat për ish-krerët e UÇK-së në Hagë

Këtë e ka konfirmuar zëdhënësja e Gjykatës Speciale, Angela Griep

Nga 15 korriku, ish- krerët e Ushtrisë Çlirimtare të Kosovës, që po mbahen në paraburgim në Hagë, do të mund të takohen me familjarët e tyre, pas gati më shumë se një viti.

Këtë e ka konfirmuar për Albanian Post zëdhënësja e Gjykatës Speciale, Angela Griep, përmes një përgjigje me shkrim.

“Zyrtari mjekësor ka këshilluar vizitat familjare personale për bashkëshorten ose partneren, prindërit, fëmijët, të cilat do të rinisin nga 15 korriku 2021 për të paraburgosurit. Vizitat me anëtarët e tjerë të familjes pritet të rinisin në gusht-shtator, nëse vlerësimi i fazës së parë është pozitiv”, ka thënë Griep, përcjell Albinfo.ch.

Sipas Griep, “regjistruesi do të vazhdojë ta monitorojë situatën dhe të angazhohet me Zyrtarin Mjekësor për të vazhduar lehtësimin e masave sa më shpejt që lejojnë shëndeti dhe siguria”.

“Për më tepër, vizitat me video do të vazhdojnë të lehtësohen me të afërmit e ngushtë të të paraburgosurve sa më shumë që të jetë e mundur”.

Arrestimet e para nga Gjykata Speciale u bënë në fund të shtatorit, të vitit të kaluar, kur në Hagë u dërgua ish-shefi i Inteligjencës së Forcës së Sigurisë së Kosovës dhe ish-epror i UÇK-së, Sali Mustafa, mbi të cilin rëndojnë akuza për “krime lufte” dhe “pjesëmarrje në ndërmarrje të përbashkët kriminale”.

Pastaj më 25 shtator u arrestuan edhe krerët e Organizatave të Veteranëve të Luftës së UÇK-së, Hysni Ngucati dhe Nasim Haradinaj, me akuzën se zbuluan informacione të cilat janë të mbrojtura me Ligjin për Dhomat e Specializuara.

Me 5 nëntor u arrestuan edhe anëtarët e tjerë të Shtabit të Përgjithshëm të UÇK-së, Hashim Thaçi, Kadri Veseli, Jakup Krasniqi dhe Rexhep selimi.

Për Thaçin dhe Veselin prokuroria pretendon se janë “përgjegjës për afro 100 vrasje”.

Mbi të paraburgosurve rëndojnë akuza për “krime kundër njerëzimit dhe krime lufte, përfshirë vrasje, zhdukje me forcë, persekutim dhe tortura”.

 

---