Nismë për anulimin e “Iniciativës kundër migrimit masiv”

Grupi Rasa thotë se ndër të drejtat sovrane të popullit është edhe e drejta për të kthyer mbrapsht vendimet e caktuara, sipas nevojës.

Sapo ka kaluar dita e referendumeve, kur populli i Zvicrës u ka thënë një Jo të madhe të tri iniciativave në nivel nacional, një iniciativë tjetër ka filluar të qesë krye. Është fjala për nismën e një grupi që i ka vënë vetes një synim të madh: të kthejë mbrapsht iniciativën kundër migrimit masiv, e cila qe votuar nga populli më 9 shkurt të këtij viti.

Siç dihet, iniciativa e përmendur, pasi kërkonte reduktim të madh të hyrjes së të huajve nga BE në Zvicër pati ngjallur polemika të mëdha e të shumta gjithandej duke i vënë në rrezik edhe raportet e Zvicrës me BE-në.

Nisur nga dëmet që sipas një pjese të madhe të opinionit i është shkaktuar imazhit të Zvicrës, iniciativa e re me titullin Rasa ose “Raus aus der Sackgasse” (jashtë nga qorrsokaku) synon eliminimin e këtij dëmi.

Ajo që në rrafshin konkret synojnë iniciuesit është që të shlyhet nga kushtetuta neni 121 i futur në muajin shkurt për “dirigjimin e migrimit”, shkruan srf.ch. Në një njoftim për medie, grupi Rasa thotë se ndër të drejtat sovrane të popullit është edhe e drejta për të kthyer mbrapsht vendimet e caktuara, sipas nevojës.

Por Rasa do ta ndërpresë iniciativën e saj në rast se qeveria dhe parlamenti ia dalin që të zbatojnë rregullat për kontingjentet e të huajve në atë mënyrë që të mos rrezikohen marrëveshjet bilaterale me BE-në.

Grupi Rasa mbështetet nga rreth 300 persona, ku bëjnë pjesë edhe rektori i ri i Universitetit të Gjenevës Yves Flückiger, artistja e njohur Pipilotti Rist, eksperti i futbollit And Egli dhe shumë profesorë dhe ndërmarrës.

Grupi ka reaguar pozitivisht ndaj rezultatit negativ të iniciativës Ecopop, që sipas tij, eshtë shenjë se shumica e popullatës është në favor të raporteve të hapura me Evropën.