Një flamur gjigant pritet të pasqyrohet më 28 nëntor

Flamuri gjigant 800 m2 gati për festimet e nëntorit në këtë qytet

Mësohet se një flamur gjigant me përmasa prej 800 metrash katrorë është duke u përgatitur në Fier për t’u shpalosur gjatë festimeve të 28 dhe 29 nëntorit. Ky flamur pritet të jetë më i madhi i qepur ndonjëherë deri më tani, përcjell albinfo.ch.

Kryetari i Shoqatës Atdhetare për Unitet dhe Bashkim, Kristaq Ziu, ka udhëhequr punën e qepjes së këtij flamuri monumental. Ai thekson rëndësinë e bashkimit të shqiptarëve përtej festave, duke theksuar se ky flamur do të simbolizojë unitetin e shqiptarëve nga të gjitha trevat.

“Ne pretendojmë ta kemi Shqipërinë të bashkuar, dhe shqiptarët duhet të jenë të bashkuar, jo vetëm për ditën e flamurit dhe një orë në stadium. Çdo vit, ky flamur do të marrë përmasa që ne mendojmë se do të shtrihen nga Çamëria, Ilirida, shqiptarët e Malit të Zi, deri në Luginën e Preshevës,” shprehet Ziu.

Për realizimin e këtij flamuri, ai ka theksuar se po punon rrobaqepësi më i njohur i qytetit, Artur Latja, i njohur për përkushtimin dhe patriotizmin e tij. “Këtu është harxhuar goxha material. Kemi marrë shumë nga topat e atllasit që kemi blerë, 15 copa atllasi. Punën më të madhe e ka bërë rrobaqepësi Tur Latja, që është i përkushtuar dhe shumë patriot,” shton ai.

Gjatë festimeve të 28 dhe 29 nëntorit, përveç flamurit prej 800 metrash katrorë, do të shpalosen edhe 5,000 flamuj të tjerë, duke krijuar një atmosferë festive dhe simbolike për të gjithë shqiptarët.

---