Një muaj paraburgim për edukatoret që keqtrajtuan 3-vjeçarin në çerdhe

Gjykata Themelore e Prishtinës ka caktuar masën e sigurisë prej një muaji paraburgim për dy edukatoret që dyshohen për dhunë ndaj një fëmije 3-vjeçar në një çerdhe në Fushë-Kosovë.

Zëdhënësja e Gjykatës Themelore në Prishtinë, Mirlinda Gashi, e ka konfirmuar këtë për Radion Evropa e Lirë të mërkurën.

Më 18 shtator, familjarët e 3-vjeçarit i publikuan në rrjetet sociale incizimet nga kamerat e sigurisë në çerdhen “Gëzimi Ynë” në Fushë- Kosovë, ku thanë se shfaqen edukatoret duke ushtruar dhunë ndaj fëmijës, përcjell albinfo.ch.

Ndërkohë, Prokuroria Themelore e Prishtinës njofton se ka nisur hetime më të detajuara për edukatoret N.M. dhe N.H., të cilat dyshohen për dy vepra penale “Keqtrajtim gjatë ushtrimit të detyrës zyrtare ose autorizimeve publike” dhe “Lëndim të lehtë trupor”, tha Prokuroria.

Tutje bëhet e ditur që edhe fëmija është dërguar për ekzaminimet mjeko-ligjore.

“Me urdhër të Prokurorit të Shtetit, fëmija është dërguar për t’i përfunduar ekzaminimet e nevojshme mjeko-ligjore, sipas dispozitave të KPPRK-së, andaj në bazë të rezultateve nga ky raport, dyshohet se të pandehurat duke i keqpërdorur detyrat e tyre zyrtare, me dashje e me qëllim të shkaktimit të lëndimeve trupore, me forcë e kanë tërhequr për krahu të dëmtuarin e mitur, në atë mënyrë që i kanë shkaktuar lëndime të lehta trupore”, thuhet në njoftimin e Prokurorisë, përcjell albinfo.ch.