Një trend në TikTok, rrezik që udhëtarët të humbasin fluturimet

(KEYSTONE/Gaetan Bally)

Një trend i ri në rrjetin social TikTok, i njohur si “teoria e aeroportit”, po sfidon udhëtarët që zakonisht arrijnë në aeroport shumë herët. Ideja që qëndron pas këtij trendi është që, në vend që të mbërrijnë me orë të tëra paraprakisht, udhëtarët të paraqiten në aeroport vetëm 15 deri në 20 minuta para nisjes së fluturimit.

Sfida konsiston në faktin që, nëse keni kryer “check-in” elektronikisht dhe udhëtoni vetëm me bagazh dore, mund të kaloni shpejt sigurinë dhe të arrini në kohë te porta e imbarkimit.

“Teoria e aeroportit synon të verifikojë nëse është me të vërtetë e nevojshme të arrish në aeroport shumë herët për të kapur fluturimin”, shpjegon Betsy Grunch, një neurokirurge me 2.4 milionë ndjekës në TikTok.

Disa influencerë me miliona ndjekës kanë provuar me sukses këtë sfidë, duke kaluar të gjitha procedurat për vetëm disa minuta dhe duke arritur fluturimet e tyre në kohë.

Megjithatë, kjo teori nuk rekomandohet për ata që udhëtojnë nga zona metropolitane apo aeroporte shumë të ngarkuara.

Në Aeroportin Ndërkombëtar të Denverit – i gjashti më i ngarkuari në SHBA gjatë vitit 2023 – autoritetet theksojnë se këshilla për të arritur në aeroport 2 deri në 3 orë përpara nisjes mbetet e vlefshme, për shkak të mundësisë së vonesave të paparashikuara si moti i keq apo probleme me transportin e brendshëm, raporton CNN, përcjell albinfo.ch.