Një zviceran pritet të bëhet kryetar i Kosovës

Mediet zvicerane në raportimet e tyre vendosin theksin në shtetësinë zvicerane të kryetarit potencial të Kosovës, Behgjet Pacollit

Ky është titulli me lajmin, se Behxhet Pacolli do të jetë kryetar i Kosovës, i publikuar sot në mediat zvicerane. Sipas tyre, kreu i Aleancës Kosova e Re (AKR), Behgjet Pacolli ka edhe shtetësinë zvicerane.

B. Pacolli kishte emigruar në Zvicër, në vitin 1976 dhe posedon pasaportë zvicerane që prej viti 1990. Ai e kishte themeluar në Lugano kompaninë e tij, Mabetex. Më pas, me partinë e tij politike, në vitin 2006, ai u inkuadrua në skenën politike të vendit të tij të lindjes dhe më pas është zhvendosur në Parlament.

Ai është konsideruar si një nga qytetarët më të pasur të Kosovës. Sipas medieve në fjalë, “skandalet e korrupsionit, pastrimit të parave dhe kontakte me Kremlinin, e kanë sjellë Pacollin në kryetitujt e gazetave”.

Vitin e kaluar ai ka bërë përpjekje në lirimin e dy zviceranëve në Libi, Max Göldi dhe Rashid Hamdan. Hashim Thaçi dhe Behgjet Pacolli, sipas tyre, kanë kultivuar interesa të përbashkëta biznesore.