Nobelisti Muradi, këshilltar i qeverisë së Maqedonisë?

Pritet që Muradi ta shqyrtojë këtë ofertë nga BDI-ja për angazhim në të ardhmen me qëllim që t’i ndihmojë Qeverisë së Maqedonisë

Nobelistit të njohur shqiptar, Ferid Muradi me prejardhje nga Llakavica e Gostivarit do t’i ofrohet të jetë këshilltar i jashtëm i Qeverisë së Maqedonisë për shëndetësi.

Sipas burimeve partiake pritet që Muradi ta shqyrtojë këtë ofertë nga BDI-ja për angazhim në të ardhmen me qëllim që t’i ndihmojë Qeverisë së Maqedonisë.

Muradit i takon edhe shtetësia e Maqedonisë në bazë të Ligjit të shtetësisë për shkak se ka të arritura të mëdha në shkencë dhe mund të kontribuojë për vendin, njofton LAJMPRESS.

Të premten Ferid Muradi u takua me liderin e BDI-së, Ali Ahmeti në selinë e kësaj partie në Tetovë.

“Ferid Muradi është një nga figurat më të mëdha me të cilën krenohen shqiptarët”, deklaroi Ahmeti pas takimit, por pa bërë të ditur nëse me të vërtetë i ka dhënë ofertë novelistit të jetë këshilltar i Qeverisë.Ferid Muradi lindi më 14 shtator të vitit 1936 në Uajting, Indiana, të SHBA-ve. Prindit e tij janë Xhabir Murad Ejupi, shqiptar dhe e ëma Henrieta Bouman, amerikane.