Nuk i lejojnë të dhurojnë gjak, revoltohen refugjatët

Sipas tyre, përfaqësuesit e Kryqit të Kuq i kishin refuzuar në mënyrë të vrazhdë duke u thënë: “mësojeni më parë gjermanishten!"

Disa refugjatë të strehuar në Gjermani janë ndjerë të diskriminuar pasi që nuk u është lejuar të dhurojnë gjak në Kryqin e Kuq Gjerman.

Një valë pakënaqësie është ngritur kundrejt Kryqit të Kuq Gjerman në qytetin Zschopau, shkruan welt.de. Një grup refugjates kishin dashur të dhuronin gjak sikurse të tjerët, me qëllimin më të mirë që t`ia kthejnë me të mirë solidarizimin që shoqëria gjermane ka treguar për ta. Por, sipas tyre, përfaqësuesit e Kryqit të Kuq i kishin refuzuar në mënyrë të vrazhdë duke u thënë:  “mësojeni më parë gjermanishten!”

Ky rrëfim është përhapur gjithandej dhe është bërë temë edhe në një mbledhje të komunës, transmeton albinfo.ch. Por atje ishte sqaruar se nuk ka pasur diskriminim në këtë rast. Ajo që ka ndodhur në fakt është se procedura e dhënies së gjakut parasheh në mënyrë detyruese që dhuruesi të plotësojë një formular. Dhe refugjatët shpeshherë nuk janë në gjendje ta bëjnë këtë.

Në këta formularë duhen shënuar në mënyrë shumë të përpiktë të dhëna lidhur me sëmundjet e mëhershme eventuale dhe medikamentet e përdorura, përcjell albinfo.ch. Duke qenë se tek shumë refugjatë nuk mund të përjashtohet se do të bënin gabime gjatë plotësimit, ata shpesh refuzohen që të dhurojnë gjak.