Numër rekord i “punëtorëve shëtitës” nga vendet fqinje

Gjithsej 298 mijë persona nga shtetet fqinje janë regjistruar në fund te qershorit të këtij viti si të punësuar në Zvicër

Keystone

Është rritur numri i të huajve nga vendet me të cilat kufizohet Zvicra, të cilët punojnë në Zvicër duke vazhduar të jetojnë në vendet e tyre. Në tremujorin e dytë të këtij viti numri i tyre ka arritur një rekord të deritashëm.

Gjithsej 298 mijë persona nga shtetet fqinje janë regjistruar në fund te qershorit të këtij viti si të punësuar në Zvicër, ka bërë të ditur Zyra Federale për statistikë. Është ky një numër që tejkalon për 3.4% atë të tremujorit të parë të vitit.

Shumica e këtyre “punëtorëve ndërkufitarë”, rreth dy te tretat e numrit të gjithëmbarshëm gjenden në regjionin e gjerë të liqenit të Gjenevës. Atje është regjistruar edhe rritja më e madhe por 5 për qind.

Nga ana tjetër në kantonin e Tesinës numri i punëtorëve të përmendur është rritur vetëm për 0.2%. Kjo rritje sipas BFS është më e ulëta në 15 vitet e fundit.

Në përgjithësi nga Franca vijnë 52.7% të kësaj kategorie të punëtorëve, nga Italia 23.4% dhe nga Gjermania 20%.

Ministri i ekonomisë, Schneider-Ammann ka thënë se ky numër do të ndryshojë gjegjësisht do të ulet kur të fillojë jetësimi i iniciativës kundër migracionit. Ligji i ri hyn në fuqi në vitin 2017.