Nuri Seferi bokson me turkun Firat Arslan

“Unë besoj te kualiteti im dhe do të jem unë ai që do të ngre lart flamurin kuq e zi në fund të ndeshjes për të festuar fitoren, e cila ka një peshë mjaft të madhe për të ardhmen e karrierës sime”

Një ndeshje e madhe e boksit po afron. Të shtunën, më 17 shtator, rreth orës 22.00, boksieri shqiptar Nuri Seferi do të ngjitet në ring për të sfiduar ish kampionin e botës, turkun Firat Arslan.

Boksieri nga Gostivari në profilin e tij në “Facebook” ka bërë të ditur se do të zhvillojë ndeshjen e karrierës së tij.

“Unë besoj te kualiteti im dhe do të jem unë ai që do të ngre lart flamurin kuq e zi në fund të ndeshjes për të festuar fitoren, e cila ka një peshë mjaft të madhe për të ardhmen e karrierës sime”, njofton “albinfo.ch”.

“Taisoni shqiptar” ka respekt për kundërshtarin duke e cilësuar atë një boksier shumë të fortë, me karrierë të suksesshme dhe sfidues  i emrave të njohur botërorë në kategorinë “Cruiser”.  Por ai beson që se bashku me mbështetjen e publikut do të dalë fitues.

“Besoj shum se mbështetja juaj do të jetë mjaftë e fuqishme, andaj dua që këtë ndeshje ta përfundoj në menyrën më të mirë të mundshme”, ka shkruar ai.

Po ashtu në këtë mbrëmje do të boksojë edhe vëllai i tij, Sefer Seferi kundër boksierit të mirënjohur të kategorisë së rëndë, Manuel Charr.

Ndeshja do të zhvillohet në Göppingen të Gjermanisë, ndërsa do të transmetohet drejtpërdrejtë në Digitalb dhe Supersport.

Albinfo.ch