OBSH: 11% e fëmijëve evropianë janë obez

Obese 12 year old boy measuring himself

Mbipesha dhe obeziteti tek fëmijët në Europë po kthehet në një kërcënim. Një raport i ri i OBSH, bazuar në të dhënat e Nismës Evropiane për Mbikëqyrjen e Obezitetit në Fëmijëri tregon se 25% e fëmijëve të moshës 7–9 vjeç janë mbipeshë dhe 11% obezë.

Ekspertët thonë se problemi është më i shprehur tek djemtë dhe bazuar në shifra, 27% e djemve janë mbipeshë dhe 13% obez ndërkohë që 23% e vajzave janë mbipeshë dhe 9% obeze.

Shifrat e obezitetit dhe mbipeshës ndryshojnë nga një vend në tjetrin duke bërë që nivelet e mbipeshës të variojnë nga 9% deri në 42%, ndërsa obeziteti nga 3% deri në 20%.

Katër vende, Finlanda, Malta, Sllovenia dhe Suedia, raportuan rritje të prevalencës së obezitetit pas pandemisë COVID-19, ndërsa vetëm San Marino shënoi ulje.

Mbipesha dhe obeziteti janë ndër shkaqet kryesore të sëmundjeve jo-ngjitëse dhe shkaktojnë mbi 1.2 milionë vdekje çdo vit në rajonin evropian.

Ekspertët theksojnë nevojën për politika urgjente që promovojnë dieta të shëndetshme, aktivitete fizike dhe kufizojnë marketingun e ushqimeve të pashëndetshme, për të ndaluar rritjen e kësaj epidemie.