Operacion ndërkombëtar antidrogë, 13 të arrestuar në Shqipëri, Gjermani dhe Itali

Një operacion ndërkombëtar antidrogë është zhvilluar në Shqipëri, Gjermani dhe Itali, përcjell albinfo.ch.

Raportohet se në Shqipëri janë arrestuar 3 persona, pjesë e një grupi kriminal që trafikonte kokainë nga vendet e origjinës drejt Italisë, përcjell albinfo.ch.

Operacioni policor ndërkombëtar i koduar “Sammogia”, i iniciuar nga Policia italiane, u zhvillua njëkohësisht në Shqipëri, Itali dhe Gjermani, ku ranë në pranga 13 shtetas.

Gjatë këtij operacioni të zhvilluar paralelisht në Shqipëri, Itali dhe Gjermani, u lokalizuan në Vlorë, u kapën dhe u vunë në pranga Landi Kalemaj, 52 vjeç, Floriant Muho, 38 vjeç dhe Ledjon Muho, 33 vjeç, pjesëtarë të një organizate kriminale në Itali.

Për tre shqiptarët, Gjykata e Bolonjas ka caktuar masën e sigurisë “Arrest në burg”, për veprën penale “Trafikimi i lëndëve narkotike”, kryer në kuadër të organizatës kriminale.

Sipas njoftimit të Policisë së Shtetit, Interpol Tirana dhe homologët në Itali vijojnë bashkëpunimi për të kryer ekstradimin e këtyre shtetasve në Itali.