Opozita shqiptare alarmon se mbjellja e kanabisit ka rifilluar

Ish-deputeti i Lëvizjes Socialiste për Integrim, Petrit Vasili, ka thënë se është shqetësuese, pasi sërish në Shqipëri ka rinisur mbjellja e kanabisit.

Në një status në Facebook, Vasili përmend Gjirokastrën, si zonën kryesore ku ka nisur mbjellja.

Ai ka akuzuar Policinë dhe Qeverinë, si të përfshira në këtë veprimtari kriminale.

“Kjo polici në vend që të merret me krimin, në vend që të merret me kriminelët, në vend që të merret me trafikantët, në vend që të merret me rimbjelljet masive e shumë të mëdha të kanabisit, të cilat kanë filluar sërish, edhe më keq se në 2015-ën, po merret me opozitën”, ka shkruar Vasili.