Opozita kërkon dorëheqjen e Qeverisë së Kosovës

Kuvendi i Kosovës po diskuton lidhur me dështimet dhe skandalet në politikën e jashtme, në të cilën seancë sërish ka munguar ministri i Jashtëm, Behgjet Pacolli. 

Ai  ka kërkuar që të shtyhet seanca e jashtëzakonshme për shkak të, siç ka thënë ai, agjendës së caktuar. 

Seancën e ka bojkotuar edhe Lista serbe. Deputetja e LDK-së, Vjosa Osmani, tha se “Qeveria dhe presidenti i Kosovës kanë arritur brenda një viti ta shkatërrojnë orientimin tonë gjeostrategjik që kemi mbajtur për 30 vjet”. 

Ajo ka propozuar edhe një rezolutë.  

Ndërkohë Albin Kurti ka thënë se Kosova nuk është duke funksionuar, sepse presidenti e ka hedhur në gjyq edhe kryeministrin, edhe Kuvendin. Edhe Kuvendi e ka në dy gjyqe presidentin. 

Deputeti i PSD-së, Dukagjin Gorani, ka thënë se në rast se Kosova nuk avancon përbrenda, politika e jashtme nuk do të jetë asgjë tjetër pos objekt i talljes nëpër zyrat e qeverive të botës dhe material për shpotitje për mediat ndërkombëtare.