Opozita kërkon largimin e Ballës nga delegacioni Parlamentar i Stabilizim-Asociimit

Partia Demokratike e Shqipërisë përmes një deklarate për media ka njoftuar se si opozitë do të kërkojnë largimin e deputetit Taulant Ballës nga Delegacioni Parlamentar i Stabilizim Asociimit.

Arsye e opozitës për këtë kërkesë është se deputeti Balla shoqërohet me trafikantë droge dhe mbron përdhunues me pushtet.

“Opozita e konsideron të papërshtatshëm dhe kundër produktiv për interesat evropiane të Shqipërisë që Taulant Balla të jetë pjesë e Delegacionit Parlamentar dhe bashkëkryesues i Komisionit të Përbashkët të Asociim Stabilizimit me Bashkimin Evropian”, thuhet në deklaratë.

Kryetari i grupit Parlamentar të PS-së, Taulant Balla ka reaguar në lidhje me kërkesën e opozitës duke e konsideruar atë si një eksportim balte të partnerët ndërkombëtarë.

“Çdo ditë që kalon kuptohet edhe më mirë se si Luli dështoi jo vetëm me zgjedhjet e me drejtimin politik të opozitës, po edhe me prodhimet filmike te studios PD&KUNATI shpk! Babalja dhe Salianji janë tanimë subjekte të punës së prokurorisë, njëri me fletë arresti të prerë, tjetri me faqen e nxirë nga përfshirja në film. Ndërkohë edhe filmi tjetër me nënkomisarin që u kërcënua në praninë time me armë në komisariat, është drejt dështimit të plotë sepse jetojmë në kohën dixhitale dhe ka qeliza telefonike e kamera që i nxjerrin bllof, dylbitë e Palokës”, thuhet në reagimin e tij.