Osmani dekoron futbollistët e Kosovës pas ndeshjes me Turqinë

Presidentja Vjosa Osmani priti në takim Kombëtaren e Kosovës dhe vendosi t’i nderojë futbollistët për angazhimin e tyre, një ditë pas humbjes 0-1 ndaj Turqisë në “Fadil Vokrri”.

Presidentja e Republikës së Kosovës, Vjosa Osmani, ka pritur në takim futbollistët e Kombëtares së Kosovës, ku me këtë rast ka vendosur t’i dekorojë ata për kontributin dhe përfaqësimin e vendit në arenën ndërkombëtare, përcjell albinfo.ch.

Dekorimi u bë në prani të futbollistëve të përfaqësueses, ndërsa në takim janë të pranishëm edhe kryetari i Federatës së Futbollit të Kosovës, Agim Ademi, si dhe selektori i Kosovës, Franco Foda.

Ky nderim nga Presidentja Osmani vjen vetëm një ditë pas ndeshjes ndaj Turqisë, ku Kosova u mposht minimalisht me rezultat 0-1 në stadiumin “Fadil Vokrri”, duke mbetur pa kualifikim në Botërorin 2026.

Pavarësisht eliminimit, dekorimi shihet si një vlerësim institucional për angazhimin e futbollistëve dhe për rrugëtimin historik të Kosovës drejt një ëndrre të madhe sportive./Albinfo.ch

---