Osmani e Vuçiq përballen të hënën në KS të OKB-së

Foto FB: Presidenca e Republikës së Kosovës

Presidentja e Kosovës, Vjosa Osmani, pritet të përballet me presidentin e Serbisë, Aleksander Vuçiq, në New York. Osmani ka udhëtuar për në SHBA për ta përfaqësuar Kosovën në Këshillin e Sigurimit, në seancën, e cila do të mbahet të hënën.

Në njoftimin e Zyrës së Presidentes thuhet se në seancën e Këshillit të Sigurimit të OKB-së, presidentja Osmani pritet të flasë për progresin, zbatimin e reformave, të drejtat e njeriut, demokracinë, sundimin e ligjit si dhe fusha të tjera me rëndësi për Kosovën, transmeton Albinfo.ch.

“Presidentja po ashtu do të flasë për domosdoshmërinë për drejtësi për krimet e kryera nga Serbia në Kosovë”, thuhet në njoftim e Presidencës.

Po ashtu bëhet e ditur se përgjatë qëndrimit në New York, Osmani pritet të takohet e të koordinohet me disa nga përfaqësuesit e përhershëm të shteteve mike në Kombe të Bashkuara.

Presidentja Vjosa Osmani do të përballet me presidentin serb, Aleksandër Vuçiq.

Vuçiqi ka thënë se Serbia do t’i vazhdojë përpjekjet e saj, pavarësisht “poshtërimit” që i është bërë deri më tani.

“Ne do të vazhdojmë të luftojmë për Serbinë, për popullin tonë, për jetën dhe të ardhmen e fëmijëve tanë, që të shkojmë me kokën lart, pa marrë parasysh se ata u përpoqën të na poshtërojnë me dhunë”, ka shkruar presidenti i Serbisë në llogarinë e tij në rrjetet sociale.

Takimi i Këshillit të Sigurimit të Kombeve të Bashkuara për Kosovën do të mbahet të hënën, në orën 16:00, sipas kohës lokale të Kosovës, respektivisht në orën 10:00, sipas kohës së New Yorkut./Albinfo.ch