Osmani: Kosova, gjithmonë mirënjohëse ndaj Shteteve të Bashkuara të Amerikës

Në ceremoninë e ndërrimit të komandës dhe pranim-dorëzimit të detyrës së komandantit të Komandës Rajonale-Lindje të KFOR-it

Presidentja Vjosa Osmani mori pjesë në ceremoninë e ndërrimit të komandës dhe pranim-dorëzimit të detyrës së komandantit të Komandës Rajonale-Lindje të KFOR-it. Me këtë rast ajo ka ritheksuar mirënjohjen për mbështetjen e Shteteve të Bashkuara të Amerikës dhe rëndësinë e pranisë së trupave amerikane në Kosovë.

“Kosova do të mbetet gjithmonë mirënjohëse ndaj Shteteve të Bashkuara të Amerikës, për mbështetjen e palëkundur në të gjitha etapat e shtetndërtimit dhe forcimit të paqes e sigurisë në vend”, ka thënë presidentja e vendit, thuhet në një njoftim të presidencës.

Presidentja Osmani e ka uruar kolonelin Sargeant për detyrën e re, duke e siguruar për mbështetjen e plotë të institucioneve të Kosovës në përmbushjen e mandatit të tij dhe të misionit të KFOR-it të udhëhequr nga NATO.

“Ajo theksoi gjithashtu rëndësinë e jashtëzakonshme të pranisë së trupave ushtarake amerikane në Kosovë, të cilat, sipas saj, “jo vetëm që garantojnë stabilitet dhe siguri afatgjatë, por edhe dërgojnë një mesazh të qartë përkushtimi ndaj paqes dhe sigurisë në gjithë rajonin”, përfundon njoftimi.

Në ceremoninë e ndërrimit të komandës së KFOR-it kanë marrë pjesë edhe kryeministri, Albin Kurti dhe ministri i mbrojtjes, Ejup Maqedonci.

---