Pajtim në parim për kërkesën amerikane në fushë të tatimeve

Në marrëveshjen e kontestuar të tatimit të dyfishtë me SHBA-në do të duhej të jenë të mundshme edhe kërkesat grupore

Pas një seance maratonike, Dhoma Nacionale e Parlamentit të Zvicrës ka arritur mbrëmë pajtimin për miratimin e ligjit për ndihmë administrative tatimore. Kundër kanë votuar vetëm deputetët e SVP-UDC-së. Ligji rregullon parimet në të cilat do të mbështetet ndihma administrative që Zvicra do tu japë autoriteteve të huaja në çështjen e tatimeve.

Me këtë ligj nuk parashihen kërkesa grupore as pyetje lidhur me të dhënat e vjedhura bankare por do të ketë ndihmë administrative edhe atëherë kur do të mungojnë emrat konkretë të personave që u kanë ikur tatimeve.

Ndërkaq, në marrëveshjen e kontestuar të tatimit të dyfishtë me SHBA-në do të duhej të jenë të mundshme edhe kërkesat grupore. Por vendimin përfundimtar për këtë çështje, parlamentarët e kanë shtyrë për të hënën, shkruan drs.ch.

Marrëveshja në fjalë parasheh që SHBA-së t`i ofrohet ndihmë administrative nga Zvicra jo vetëm në rastet kur bëhet fjalë për mashtrim në tatime por edhe kur është fjala për evazion fiskal. Për këto raste nuk nevojiten emrat ose numrat e llogarive të klientëve bankarë. Mjafton përshkrimi i një “modeli sjelljeje”, që do të nënkuptojë se klienti në fjalë ka bërë evazion fiskal.