Paralajmërim për trafik të rënduar në Zvicër gjatë muajit shkurt

TCS

Zyra Federale e Rrugëve të Zvicrës (ASTRA) paralajmëron për rritje të ndjeshme të trafikut gjatë muajit shkurt, për shkak të pushimeve shkollore dhe udhëtimeve drejt zonave të sporteve dimërore.

Sipas autoriteteve, fundjavat do të jenë më problematike, ndërsa autostradat A1, A2, A3, A8, A9 dhe A13 pritet të përballen me kolona të gjata. Trafik i rënduar parashikohet edhe në zonat urbane të Zyrihut, Bernës, Bazelit, Lucernës, Churit dhe Luganos.

Vonesa priten në tunelin e Gotthardit, në itinerarin San Bernardino, si dhe në rrugët drejt Oberlandit të Bernës dhe Valais-it. Po ashtu, pritet fluks i shtuar edhe në trenat për transport automjetesh në Furka, Lötschberg dhe Vereina.

ASTRA u bën thirrje shoferëve që të planifikojnë udhëtimet me kujdes, të tregojnë durim dhe të qëndrojnë në autostradë gjatë kolonave, për të shmangur ngarkesën në zonat e banuara.