Parregullsi në numërim: Në këtë kanton do të përsëritet votimi

Kantoni zviceran Zug do të përsërisë votimin për nismën e transparencës më 22 shtator. Votimi i të dielës është shpallur i pavlefshëm për shkak të numërimit të gabuar.

Qeveria kantonale tha të mërkurën se vetëm katër nga 11 komunat në Zug kishin numëruar saktë. Ka pasur mospërputhje “të vogla” në tri komuna dhe mospërputhje “të rëndësishme” në katër komunat e tjera, transmeton albinfo.ch.

Fletët e votimit të shpuara për nismën për transparencë kishin shkaktuar konfuzion në vendvotimet komunale. Kjo përbëhej nga tre pjesë, një për iniciativën, një për kundërpropozimin dhe një për çështjen e balotazhit, shkruan swissinfo. Që votimi të ishte i vlefshëm, duhej të ktheheshin të tre fletët e votimit.

Ishte hera e parë që kantoni Zug kishte fletë votimi të shpuar. Kjo kishte për qëllim që të lehtësonte numërimin e qendrave të votimit. Megjithatë, disa komuna nuk i shpallën të pavlefshme fletëvotimet e paplota.