Pas Kroacisë, edhe Bullgaria do të dërgojë 100 ushtarë në Kosovë

Raportohet se Bullgaria do të dërgojë një kontingjent prej 100 ushtarëve në Kosovë, në kuadër të KFOR-it, përcjell albinfo.ch.

Dislokimi, sipas agjencisë bullgare të lajmeve “Novinite”, shënon një kontribut të rëndësishëm në përpjekjet e NATO-s për të ruajtur paqen dhe stabilitetin në rajon.

Ceremonia e dërgimit të kontingjentit ushtarak në Kosovë do të mbahet në sheshin “Georgi Izmirliev” në Blagoevgrad sot (e enjte). Ata do të zbarkojnë në Kosovë javët në vijim.

Kontingjenti përbëhet kryesisht nga Komanda e Brigadës së Tretë në Blagoevgrad, e cila do të dislokohet për operacione me Forcën e Stabilizimit të NATO-s në Kosovë (KFOR).

Kontingjenti bullgar do të angazhohet në aktivitete që synojnë të mbështesin përpjekjet për rivendosjen dhe ruajtjen e sigurisë në Kosovë.

Aktualisht, Bullgaria ka rreth 48 ushtarë në Kosovë. Ky numër do të rritet në rreth 150.

KFOR-i ka gjithsej 4.443 trupa nga 28 vende. Numri i trupave është rritur që nga tensionet e majit të vitit të kaluar.