Pasojat psikologjike nga Covid-19

(KEYSTONE/Ti-Press/Alessandro Crinari)

Ngarkesa emocionale, frika dhe mënyra e përjetimit të sëmundjes së COVID-19 dhe pandemisë ka shtuar numrin e personave që i drejtohen Spitalit Psikiatrik me çrregullime të shëndetit mendor.

“Pa dyshim që kemi një rritje të shqetësimeve të karakterit psikiatrik. Është e padiskutueshme që një pacient që nuk ka pasur kurrë probleme psikiatrike, pas kalimit të COVID-19 ose në periudhën e pandemisë, për shkak të stresit të ngarkuar mund të kenë shfaqur për herë të parë çrregullime psikiatrike”, shprehet Irena Thoma, mjeke psikiatër, transmeton Euronews, përcjell Albinfo.ch.

Mjekja thotë se pritet një rritje e konsiderueshme e personave që vuajnë nga sëmundja e demencës ose Alcaimer, e cila çon në plakjen e trurit.

“Jo detyrimisht është COVID që shkakton Alcaimer, por ka një lidhje që është e pakundërshtueshme. Një person i cili vuan nga Alcaimer ka një tru që vjen duke u rrudhosur, atëherë fillon të humbasë vezullimin e personalitetit, të karakterit, të bëhet një person me dëmtim përqendrimi, me dëmtim të kujtesës, me dëmtim të aftësisë për t’u kujdesur për veten”, tregon mjekja.

Demenca mund të fillojë me një gjendje depresive, me dëmtim të kujtesës, vështirësi për të marrë informacione të reja, pagjumësi.

Për të shmangur të tilla simptoma, për pacientët që po kalojnë COVID-19 mjekja këshillon që ata të fokusohen në shërimin e tyre dhe jo te frika.

“Zbatimi i këshillave mjekësorë, trajtimi në mënyrë maksimale ashtu sikurse këshillohet, jep shanse që problemi të kalojë më lehtë”, këshillon mjekja psikiatër.