Peja në hartën botërore të turizmit

Peja do të bëhet destinacion botëror turistik, kryesisht në projektin ndërkufitar “Majat e Ballkanit” që përfshin trekëndëshin, Kosovë, Shqipëri dhe Mali i Zi

Forumi i kompanive lidere të turizmit “World Travel and Tourism Council”, me seli në Londër, ka përzgjedhur Pejën, si qytetin më të bukur në rajon, veçanërisht me potencialet turistike të zonave malore.

Peja, siç thuhet, do të bëhet destinacion botëror turistik, kryesisht në projektin ndërkufitar “Majat e Ballkanit” që përfshin trekëndëshin që lidh pikat kufitare, Kosovë, Shqipëri dhe Mali i Zi.

Sipas “World Travel and Tourism Council”, Peja është përzgjedhur në treshen finale ndërkombëtare të çmimit “Tourism for Tomorrow” i themeluar më 1990 me seli në Londër. Fituesi pritet të shpallet me 16 prill në Abu Dabi, raporton Koha.

Drejtoria për Zhvillim Ekonomik e Kuvendit Komunal të Pejës që e ka udhëhequr këtë projekt të prezantimit të potencialeve turistike të Pejës, ka thënë se për qytetin ky është rasti më i mirë për afirmimin e vlerave turistike dhe zhvillimin ekonomik të kësaj ane.

“Kjo nënkupton se me këtët ne do t’i afirmojmë vlerat turistike të këtij vendi”, tha Sokol Ukaj, drejtor i Zhvillimit Ekonomik. “Do të vijnë dhe do të na kontrollojnë terrenin. Kjo vlen edhe për vendet tjera konkurrente”, ka thënë Ukaj, sipas të cilit, Peja po dëshmohet si zonë turistike botërore.