Për tre muaj, ekonomia shqiptare përfitoi 500 milionë € nga turizmi

Për periudhën korrik-shtator, ekonomia shqiptare përfitoi 521 milionë euro nga turizmi, ose 25 për qind më shumë se vitit të kaluar

Vetëm në tremujorin e tretë të këtij vitit, ekonomia shqiptare përfitoi më shumë se gjysmë miliard euro nga turistët dhe vizitorët e huaj që hynë në vend për qëllime biznesi. Këto shifra i ka publikuar të martën Banka e Shqipërisë në bilancin tremujor të pagesave.

Sipas të dhënave, për periudhën korrik-shtator, që përbën dhe pikun e sezonit turistik, vizitorët e ardhur nga jashtë shpenzuan 521 milionë euro në Shqipëri, ose 25 për qind më shumë se në përudhen e njëjtë të vitit të kaluar, raporton TCH.

Ndërsa për të gjithë 9 mujorin, ekonomia ka përfituar nga shpenzimet e udhëtarëve që hyjnë nga vendet e tjera 1 miliard e 161 milionë euro, ose mbi 15 për qind më shumë se një vit më parë.

“Ky është niveli më i lartë i të ardhurave që është regjistruar ndonjëherë nga udhëtimet, çka sinjalizon se gjatë këtij viti turizmi mund të jetë shndërruar në një nga sektorët kyç që ka udhëhequr rritjen ekonomike”.

Një ditë më parë Instituti i Statistikave raportoi se pikërisht gjatë tremujorit të tretë të vitit ekonomia shtoi 18 mijë e 600 vende të reja pune. Të dhënat e detajuara tregojnë se një pjesë e mirë punësimeve të reja kanë ardhur nga sektori i shërbimeve, që është i lidhur ngushtë me turizmin.