Përdorimi i maskave për t’i ikur ndalimit të mbulimit të fytyrës, turistët arabë gjejnë zgjidhje kreative

(KEYSTONE/Laurent Gillieron)

Që nga 1 janari 2025, në Zvicër ka hyrë në fuqi ndalimi i mbulimit të fytyrës në hapësirat publike. Ligji prek në veçanti gratë me mbulesa fetare, kryesisht turistet nga vendet arabe. Por, siç tregon rasti i qytetit turistik Interlaken, gratë e prekura po i përshtaten rregullave me zgjidhje kreative,

Në zemër të Interlakenit ndodhet një agjenci udhëtimi që operon në gjuhën arabe, e cila ofron bileta treni dhe guida për turistët nga Arabia Saudite, Kuvajti dhe Katari. Pronari i saj, Emad Boutrous, thotë se ndalimi nuk ka ndikuar në numrin e vizitorëve: “Malet, klima dhe ajri i pastër ende tërheqin njerëzit në Zvicër”, transmeton albinfo.ch.

Zgjidhja? Maska në vend të mbulesës fetare. Shumë gra myslimane, që dikur mbanin nikab apo burka, tani përdorin maska për fytyrën, një praktikë që po përhapet gjithnjë e më shumë. “Për to, është një kompromis i pranueshëm,” shprehet Boutrous. Ai shpesh i këshillon klientet që të blejnë maska në farmacitë lokale, për të shmangur problemet me autoritetet.

Maskat janë kthyer në një mënyrë efikase për të respektuar ndalimin, duke ruajtur një nivel modestie që përputhet me bindjet fetare. Megjithatë, shumë nga turistët nuk janë të gatshëm të flasin publikisht për këtë çështje – temën e ndalimit e shmangin menjëherë.

Autoritetet lokale po tregojnë fleksibilitet. Kryetari i bashkisë së Interlakenit, Philippe Ritschard, pranon se është në dijeni të “trukut” me maska. “Njerëzit janë shpikës”, thotë ai me një buzëqeshje. Ai shton se zbatimi i ligjit është detyrë e policisë, jo e bashkisë, dhe se shpeshherë zgjidhet që “të mbyllet një sy”.

Ndërkohë, zyra lokale turistike konfirmon se nuk ka pasur reagime zyrtare nga turistët arabë. “Shumica përshtaten. Nuk e shohin këtë ndalim si një sulm ndaj kulturës së tyre,” thekson përfaqësuesi Renato Julier. Megjithatë, përdorimi i maskave nuk rekomandohet zyrtarisht si zgjidhje për të anashkaluar ligjin, shkruan SRF.

Pavarësisht sfidave, rezervimet nga rajonet arabe për sezonin turistik 2025 janë mjaft premtuese, duke treguar se atraktiviteti i Zvicrës nuk është zbehur. Ndërsa rregulloret e reja sjellin sfida të reja, vizitorët vazhdojnë të gjejnë mënyra për të shijuar udhëtimin pa cenuar bindjet e tyre, transmeton albinfo.ch.