Pesë shqiptarë arrestohen se e kërcënuan një shtetase gjermane

Sipas policisë, këta shtetas dyshohet se nën efektin e alkoolit, në bashkëpunim me njëri-tjetrin kanë kanosur me armë zjarri shtetasen gjermane A.T.

Policia e Shkodrës ka arrestuar pesë persona të cilët kishin kanosur me armë zjarri një shtetase gjermane, bëjnë të ditur mediat shqiptare.

Sipas policisë shqiptare, shtetasja gjermane me iniciale  A.T., 23 vjeçe ka bërë kallëzim në Komisariatin e Policisë Shkodër se është kanosur me armë zjarri nga pesë shtetas që lëviznin me një automjet dhe të armatosur me armë zjarri, përcjell albinfo.ch.

Menjëherë pas këtij kallëzimi policia e Shkodrës ka ngritur grupin hetimor dhe falë veprimeve të shpejta hetimore dhe operative u identifikua mjeti me 5 shtetasit e dyshuar si dhe u arrestuan në flagrancë shtetasit: Ersid  Hasaj, 25 vjeç, Shpëtim Buraniqi 22 vjeç, Bashkim Buraniqi 24 vjeç, Armen Lisaj 25 vjeç, Shuajp Molla 58 vjeç.

Sipas policisë, këta shtetas dyshohet se nën efektin e alkoolit, në bashkëpunim me njëri-tjetrin kanë kanosur me armë zjarri shtetasen gjermane A.T.

Ndaj shtetasit Ersid Hasaj policia ka ngritur akuzën për veprën penale “Kanosje” dhe “Armëmbajtje pa leje”, ndërsa për veprat penale “Kanosja” dhe “Moskallëzim krimi” akuzohen shtetasit e tjerë, Shpëtim Buraniqi, Bashkim Buraniqi, Armen Lisaj dhe Shuajp Molla.