Plaçkitje me kalashnikovë në Kantonin Vaud

Në Mont-sur-Lausanne të Zvicrës, disa persona të panjohur kanë plaçkitur një transportues të hollash. Plaçkitësit janë në arrati

Një grup personash të panjohur, natën në mes të mërkurës dhe të enjtes, në Mont-sur-Lausanne kanë plaçkitur një transportues të hollash. Vozitësit e transportuesit janë kërcënuar me kalashnikovë, ndërsa plaçkitësit janë arratisur me një shumë të hollash.

Për shumën e të hollave, policia e Kantonit Vaud nuk ka dhënë informata në komunikatën e saj të cilën e transmeton Albinfo.ch.

Plaçkitja ka ndodhur rreth orës 01:00 pas mesnate. Më pas, plaçkitësit ia kanë vënë flakën automjetit, si dhe dy furgonëve e një veture tjetër të vjedhur.

Grupi, për të cilin policia nuk ka të dhëna se prej sa personash ka qenë i përbërë, është arratisur nga vendngjarja me disa vetura. Përkundër mobilizimit të menjëhershëm të policisë për gjetjen e tyre, ata kanë mundur të arratisen. Dy vozitësit e transportuesit kanë kaluar pa lëndime, por të tronditur nga ngjarja.

Në Kantonin Vaud, vitin e kaluar ishte kidnapuar për në Francë një transportues të hollash në mënyrë spektakolare dhe atje është plaçkitur. Plaçkitësit e dyshuar kishin marrë rreth 40 milionë franga, por pas një kohe të shkurtër janë arrestuar.