Policia e Kosovës: Nuk ka grupe të armatosura në kufij

Nuk ka asnjë grumbullim apo individ të personave të armatosur në kufirin ndërmjet Kosovës dhe Maqedonisë në rajonin e Radushës, thotë Policia e Kosovës

Policia e Kosovës ka përgënjeshtruar lajmin që u dha nga Ministria e Punëve të Brendshme (MPB) e Maqedonisë se nga territori i Kosovës kanë hyrë në rajonin e Radushës, respektivisht në fshatin Saraj, rreth 50 persona të armatosur. Policia e Kosovës thotë se nuk është vërejt asnjë person i armatosur që ka kaluar kufirin.

“Dje rreth orës 16:53, Policia e Maqedonisë ka njoftuar Policinë e Kosovës se vërehen persona të grumbulluar në brezin kufitar, respektivisht në lokacionin Krivenik–Radushë dhe me verifikimin e menjëhershëm të informacionit është konstatuar se nuk ka asnjë grumbullim apo individ në lokacionin e lartcekur dhe as në tërë zonën e brezit kufitar me Maqedoninë”, thuhet në reagimin e Policisë së Kosovës, raporton Albinfo.Ch.

Kjo deklaratë, siç thuhet, i referuar deklaratës së djeshme të MPB-së të Maqedonisë, se një grup prej pesëdhjetë (50) personave kanë hyrë në Maqedoni, respektivisht në fshatin Saraj të Shkupit.

“Njësitet e Policisë Kufitare në detyra të rregullta gjatë brezit kufitar nuk kanë hasur në asnjë grumbullim të pretenduar nga pala maqedonase dhe po ashtu një gjë e tillë është konfirmuar edhe nga njësitet e Policisë Kufitare të Maqedonisë, të cilat sipas planit të përbashkët të patrullimit, dje kanë qenë së bashku me njësitet e Policisë Kufitare të Policisë së Kosovës në patrullim sipas konceptit të Menaxhimit të Integruar të Kufirit”, thuhet më tej në njoftim.

Po ashtu krahas këtyre aktiviteteve të përbashkëta me palën maqedonase, në mbikëqyrjen e brezit kufitar Policia e Kosovës, sipas komunikatës, shfrytëzon edhe kullat vrojtuese të cilat mundësojnë monitorimin dhe vëzhgimin e hapësirës së madhe të brezit kufitar nga të dy anët.

“Duke shfrytëzuar edhe teknologjinë e avancuar, del se deri më tani nuk është detektuar asnjë lëvizje e dyshimtë”, konsideron Policia e Kosovës.

Me qëllim të informimit të opinionit të gjerë, Policia e Kosovës  bën me dije se ka kapacitete të mjaftueshme për të përmbushur detyrat e saja ligjore dhe kushtetuese në raport me mbrojtjen e sigurt të kufirit të Republikës së Kosovës dhe moscenimit të tij nga askush.

“Policia e Kosovës është e gatshme për bashkëpunim me agjencitë e shteteve fqinje, duke përfshirë edhe Maqedoninë, për t’u siguruar se kemi një mbikëqyrje të mirëfilltë dhe të sigurt sipas konceptit të Menaxhimit të Integruar të Kufirit”, thuhet në reagimin e Policisë së Kosovës.