Policia e Kosovës shpall në kërkim një nga të dyshuarit për sherrin në lokalin në Prishtinë

Policia e Kosoves

Policia e Kosovës e ka shpallur në kërkim Dukagjin Nikollaj, Dukën, një javë pas sherrit në një lokal në qendër të Prishtinë, ku mbeti një i vrarë e 17 të plagosur.

“Policia e Kosovës, mbështetur në urdhëresën e nxjerrë nga Prokuroria Themelore – Departamenti për Krime të Rënda, paraqet para jush  fotografinë e të dyshuarit të shpallur në kërkim, i dyshuar për implikim në veprat penale;

– “Vrasja e rëndë në tentativë” nga Neni 173, lidhur me nenin 28, të KPK-së,

– “Shkaktim i rrezikut të përgjithshëm” nga Neni 356 të KPK-së,

–  “Përdorim i armës apo mjetit të rrezikshëm” nga Neni 367 të KPK-së, si dhe

–  “Mbajtja në pronësi kontroll ose posedim të paautorizuar të armëve” nga Neni 366 të KPK-së”, thuhet në njoftimin e Policisë së Kosovës, përcjell albinfo.ch.

Autoritetet kërkojnë ndihmën e qytetarëve për kapjen e tij.

“Me qëllim të zbatimit efikas të procedurës, kërkojmë nga publiku i gjerë kontributin qytetar që me informacionet e tyre të ndihmojnë lokalizimin e vendndodhjes së të dyshuarve të shpallur në kërkim”, vazhdon tutje njoftimi, përcjell albinfo.ch.