Policia e Kosovës vizitë studimore në Gjermani

Kosovo Police

Javën e kaluar një delegacion nga Policia e Kosovës i udhëhequr nga Kolonel Taibe Canolli Brajshori ka realizuar një vizitë studimore zyrtare në landin federativ Berlin dhe Brandenburg në Gjermani.

“Synimi i vizitës ishte lidhja dhe shkëmbimi i njohurive dhe përvojave në zhvillimin e grave në pozicione drejtuese në polici, duke u fokusuar në mentorimin e grave në Policinë e Shtetit të Brandenburgut dhe në Policinë e Kosovës si dhe shkëmbimi  i përvojave në trajnimin dhe avancimin profesional të punonjësve të policisë duke avancuar trajnimet policore dhe ngritur kapacitetet profesionale të Policisë së Kosovës”, thuhet në njoftimin e Policisë së Kosovës.

Në Brandenburg delegacioni kosovar është pritur nga Presidentja  e Shkollës së Policisë në Brandenburg  znj.Dr.Heike Ëagner dhe stafi i saj. Nga presidentja Wagner është dhënë zotimi dhe hapi i parë drejt jetësimit të deklarimit të përbashkët të nënshkruar me datë  22.10.2019 ndërmjet Policisë së Kosovës dhe Akademisë Policore në Brandenburg.

“Gjatë kësaj periudhe delegacioni nga Policia e Kosovës  është takuar edhe me agjentë special dhe Atashe të FBI  të stacionuar në Berlin. Me delegacionin në fjalë është shikuar mundësia e trajnimeve speciale në fushat e ndryshme deri tek ato të ndjeshme të sigurisë siç janë trajnimet e veçanta të sigurisë. Është vizituar edhe Akademia e Policisë në Berlin dhe është shikuar mundësia e  shkëmbimit  të përvojave policore me akademinë në fjalë si dhe është vizituar stacioni i policisë në Bernau”, sqaron Policia e Kosovës, përcjell albinfo.ch.