Policia zvicerane do të ketë një uniformë të unifikuar në të gjithë vendin

(KEYSTONE/Christian Beutler)

Në të ardhmen, të gjithë oficerët e policisë në Zvicër do të veshin të njëjtën uniformë. Forcat policore në rajonet frankofone dhe italofone të vendit do të adoptojnë uniformën e re KEP, e cila tashmë përdoret nga shumica e policive të tjera zvicerane.

Ndryshimi do të ndodhë gradualisht, në disa faza, nga viti 2026 deri në 2028.

Sipas Konferencës Latine të Komandantëve të Policisë (CLCPC), me këtë hap “forcat latine të policisë i bashkohen policive të tjera zvicerane që e kanë pranuar këtë uniformë të përbashkët që prej vitit 2015”, transmeton albinfo.ch.

Qëllimi i projektit KEP është të sigurojë “një pamje të unifikuar për oficerët e policisë në Zvicër, të ulë kostot e blerjes dhe të optimizojë menaxhimin logjistik”, thuhet në komunikatë. Ky menaxhim logjistik drejtohet nga një komitet nën kujdesin e policive kantonale të Bernës dhe Cyrihut.

Uniforma e re KEP, tashmë e miratuar nga policia kantonale e Cyrihut, do të ruajë dallime midis forcave përmes stemave dhe shenjave dalluese. Ngjyra blu do të jetë për policinë, ndërsa versioni gri do të përdoret nga oficerët e sigurisë publike dhe asistentët.

Në kuadër të qëndrueshmërisë, uniformat aktuale nuk do të zëvendësohen menjëherë. Artikujt e konsumuar do të ndërroren gradualisht, në tre faza, nga viti 2026 deri më 2028.