Politikani nga Kosova që dyshohet se fshehu 4 milionë euro në “Credit Suisse” në Zvicër

(KEYSTONE/Urs Flueeler)

Drejtori i Agjencisë për Parandalimin e Korrupsionit, Ylli Buleshkaj, në një intervistë së fundmi ka përmendur rastin e një politikani që ka fshehur miliona euro nga deklarimi i pasurisë. Kjo deklaratë ngjalli reagimin e deputetit të Vetëvendosjes, Dimal Basha. Basha i ka bërë thirrje Prokurorisë që të hetohet ky politikan.

Por, për kë e ka pasur fjalën drejtori i Agjencisë për Parandalimin e Korrupsionit?

Akan Ismaili, i besuari i Kosovës për ambasador në SHBA më 2012-ën, i kishte fshehur nga institucionet e transparencës afro katër milionë euro në bankën “Credit Suisse” në Zvicër.

Si ambasador deri në vitin 2015, Ismaili ishte i detyruar ligjërisht të deklaronte pasurinë në Agjencinë Kosovare për Parandalimin e Korrupsionit. Ai raportoi prona, kursime në para dhe kompani të ndryshme, por jo edhe katër milionë eurot e fshehura, transmeton insajder, përcjell albinfo.ch.

Ndaj tij kishin filluar hetimet nga Prokuroria Speciale në janar të 2023-ës. Deri më tani, s’është ndërmarrë asnjë veprim ligjor ndaj tij.

Banka Credit Suisse, në qershor të 2022-ës ishte shpallur fajtore dhe gjobitur për përfshirje në pastrim të parave në lidhje me një rrjet të drogës nga Bullgaria.

Credis Suisse është banka e dytë më e madhe në Zvicër. Kjo ishte hera e parë në histori të Zvicrës që po hetohej një bankë nga autoritetet kompetente.

Sipas Kodit Penal të Republikës së Kosovës, zyrtarët e lartë publikë që fshehin pasurinë ose bëjnë deklarime të rreme mund të gjobiten dhe të burgosen deri në pesë vjet.