Popullsia e Zvicrës do të arrijë në 9 milionë këtë vit

pixabay

Në fund të shtatorit vendi kishte mbi 8.9 milionë banorë. Ai duhet të kalojë shifrën prej 9 milionë në 2023-ën, një rritje që tejkalon atë të vendeve fqinje, përcjell albinfo.ch.

Që nga prezantimi i marrëveshjes për Lëvizjen e Lirë të Personave më 2002, duke u lejuar qytetarëve të BE-së një akses pothuajse të pakufizuar në tregun zviceran të punës, popullsia e Zvicrës është rritur ndjeshëm falë imigrimit të fortë.

Për krahasim, në vitin 2001, një vit para hyrjes në fuqi të marrëveshjes, popullsia e Zvicrës ishte 7.25 milionë.

“Zvicra pa dyshim përfiton nga emigracioni, por kjo vjen me disavantazhe dhe kosto”, sipas historianit ekonomik Tobias Straumann.

Ndër anët negative është “banimi më i vogël dhe më i shtrenjtë. Gjithashtu, infrastrukturat janë nën tendosje të madhe dhe integrimi bëhet një sfidë,” shtoi ai.