Posta e Zvicrës, pullë speciale me temë koronavirusin

Duke i blerë këto pulla, konsumatorët dhurojnë shumën e caktuar për njerëzit që kanë më shumë nevojë në këtë situatë

Posta Zvicerane (Swiss Post) do të emetojë një pullë postare të krijuar posaçërisht në lidhje me koronavirusin, shkruan srf.ch

“Solidariteti Covid-19”, siç mban emrin pulla, nga njëra anë ka për qëllim të tregojë solidaritet me të prekurit në vend, transmeton albinfo.ch. Ndërsa, nga ana tjetër, ai synon që nga të ardhurat e shitjes së pullës të përfitojnë ata që aktualisht kanë nevojë urgjente për ndihmë.

Organizata humanitare “Glückskette” dhe Kryqi i Kuq i Zvicrës do t`i shpërndajnë paratë në destinimet e caktuara, bën të ditur Posta e Zvicrës.

Një pullë e vetme kushton pesë franga. Por pullat janë në dispozicion në blloqe prej dhjetë copësh që së bashku kushtojnë 50 franga, përcjell albinfo.ch. Duke i blerë këto pulla, konsumatorët dhurojnë shumën e përmendur për njerëzit që kanë më shumë nevojë në këtë situatë.

---