Prekaz, shënohet Dita e Diasporës dhe Mërgatës

Rifat Jashari, në emër të familjes së komandantit Legjendar Adem Jashari iu uroi mirëseardhje të gjithë bashkatdhetarëve në Prekaz dhe në kullën e Jasharëve

Qindra bashkatdhetarë të ardhur nga të gjitha viset e Kosovës janë bashkuar mbrëmë në Prekaz të Skenderajt, në Kompleksin Memorial “Adem Jashari”, për të shënuar Ditën e Diasporës dhe Mërgatës, që tradicionalisht organizohet nga Ministra e Diasporës me 2 gusht.

Në fjalën e tij përshëndetëse, ministri në detyrë, Ibrahim Makolli, falënderoi të gjithë pranishmit duke rikujtuar edhe njëherë kontributin e madh që bashkatdhetarët tanë e kanë dhënë përgjatë historisë së kombit shqiptar dhe për shtetin e Kosovës.

Po ashtu, Rifat Jashari, në emër të familjes së komandantit Legjendar Adem Jashari ju uroi mirëseardhje të gjithë atyre që i quajti vëllezër dhe motra, në Prekazin legjendar dhe në kullën e Jasharëve.

Në bazë të Ligjit mbi Diasporën dhe Mërgatën, me vendim të datës 21.07.2014, Ministri i Diasporës, Ibrahim Makolli me rekomandim të komisionit pesë anëtarësh për kontribut të veçantë për mërgatën apo shtetin e Kosovës ndau edhe çmimet vjetore për mërgimtarin/grupin më të suksesshëm të vitit.

Ndryshe, që nga fillimi i muajit korrik e deri më 15 gusht nëpër të gjitha komunat e Kosovës organizohen manifestime kulturore, artistike, koncerte, orë letrare, tubime, me rastin e ardhjes së bashkatdhetarëve në Kosovë. Ndërsa takimi tradicional për gjithë Diasporën mbahet në
Prekaz me 2 gusht. Ky është takim tradicional.