Presidenti i Gjermanisë, Shtajnmajer, qëndron për vizitë zyrtare në Shkup

Bëhet e ditur se presidenti Stevo Pendarovski sot dhe nesër do të jetë nikoqir i Presidentit të Republikës Federale të Gjermanisë, Frank-Walter Shtajnmajer, i cili do të qëndrojë për vizitë zyrtare në Republikën e Maqedonisë së Veriut.

Sipas agjendës, është paraparë që presidenti gjerman të mbajë fjalim para deputetëve, të takohet me të rinjtë në Qendrën Presidenciale për Edukim Politik, të bisedojë me grupin e xhirimit të filmit “Medena zemja” dhe të vizitojë parkun e erës në Bogdanci.

Ndërkohë që pasdite në Qeveri është planifikuar takim i presidentit gjerman me kryeministrin Dimitar Kovaçevski.

Kjo është vizita e parë e presidentit gjerman Shtajnmajer në Republikën e Maqedonisë së Veriut. Ndërkohë që pas RMV-së, do të qëndrojë për vizitë zyrtare dhe në Shqipëri. /Albinfo.ch