Presidenti i Greqisë: Shqipëria po minon rrugën drejt BE-së

  Ai ka thënë se Shqipëria duhet të gjejë vendin e saj në BE, por ka kërkuar që shteti fqinj të respektojë të drejtat evropiane.

Presidenti i Greqisë, Prokopis Pavlopoulos ka folur me tone të ashpra kundër dy shteteve fqinje Shqipërisë dhe Maqedonisë. “Shkupi dhe Tirana po minojnë, me veprimet e tyre politike, ecurinë e tyre evropiane, njëri fqinj duke përdorur një emër që përcjell irredentizmin dhe fqinji tjetër duke shkelur të drejtat themelore të njeriut dhe në veçanti të pronës”, ka thënë presidenti grek në darkën që ka shtruar për nder të vizitës së presidentit francez  Emmanuel Macron.

Ai ka thënë se Shqipëria duhet të gjejë vendin e saj në BE, por ka kërkuar që shteti fqinj të respektojë të drejtat evropiane.

“Një prej shtyllave të të drejtave evropiane janë të drejtat e njeriut. Kur shikojmë shkelje të tilla të të drejtave themelore, siç është për shembull e drejta e pronësisë, si është e mundur që Greqia të favorizojë një perspektivë të tillë evropiane, të një shteti që shkel këto të drejta?!”, ka thënë presidenti grek Pavlopoulos.