Presidenti i Kosovës, vizitë dy ditore në Shqipëri

Pacolli do të shoqërohet nga disa ministra dhe nga përfaqësues të biznesit

Presidenti i Republikës së Kosovës, Behgjet Pacolli do të nisë ditën e hënë vizitën e tij të parë shtetërore në Shqipëri me ftesë të Presidentit, Bamir Topi.

Presidenti Pacolli, fillimisht do të pritet në Pallatin e Brigadave në Tiranë nga Presidenti Topi, ndërsa më pas dy homologët do të zhvillojnë një bisedë kokë më kokë, ku do të diskutojnë për marrëdheniet dypalëshe dhe për thellimin e tyre.

Nga ana tjetër, Pacolli do të takoj edhe krerë të tjerë të shtetit shqiptarë, ku përfshihet Kryeministri Sali Berisha, kryetarja e Kuvendit Jozefina Topalli, kryetari i opozitës Edi Rama, Ministri i Puneve të Jashtme Edmond Haxhinasto dhe kryetari i Partisë së Çamëve, Shpëtim Idrizi.

Më datën 22 mars, Presidentit të Kosovës do t’i jepet titulli “Honoris Causa” nga Universiteti Europian i Tiranës dhe më pas, do të zhvillojë një takim në Forumin e Biznesit Shqipëri-Kosovë, ku pritet të flasë për idenë e krijimit të kushteve për lëvizjen e lirë të njerëzve, ideve e mallrave, duke jetësuar në këto hapësira idenë e Minishengenit dhe për rëndësinë e madhe të bashkëpunimit ekonomik.

Presidenti i Kosovës do të mbyllë vizitën e tij të parë si Kryetar Shteti në Shqipëri me një vizitë në qytetet e Krujës dhe të Lezhës, ku disa kohë më parë u shpall ‘Qytetar Nderi’.