Presidentja Osmani uron qytetarët për Vitin e Ri 2026: Kosova të ecë përpara me unitet, siguri dhe zhvillim

Presidentja e Republikës së Kosovës, Vjosa Osmani, u ka drejtuar qytetarëve dhe bashkatdhetarëve kudo në botë me një mesazh urimi me rastin e ndërrimit të viteve, duke reflektuar mbi sfidat dhe arritjet e vitit që po përmbyllet, si dhe duke shpalosur synimet për vitin 2026.

Në fjalimin e saj, Presidentja Osmani theksoi se viti që po lihet pas ka qenë një vit sfidues, por i rëndësishëm për forcimin e pozitës ndërkombëtare të Kosovës, mbrojtjen e rendit kushtetues dhe ruajtjen e interesit shtetëror. Ajo vlerësoi se Kosova ka dëshmuar vendosmëri dhe unitet, duke u shndërruar në një faktor të besueshëm të paqes dhe stabilitetit në arenën ndërkombëtare.

Presidentja nënvizoi se Kosova ka qëndruar e palëkundur përballë përpjekjeve destabilizuese, ndërkohë që brenda vendit ka vazhduar angazhimi për ndërtimin e një shoqërie më të drejtë, ku të drejtat e njeriut, barazia dhe dinjiteti mbeten vlera themelore.

Duke folur për vitin 2026, Osmani tha se Kosova hyn në vitin e ri me përgjegjësi të reja dhe synime të qarta për më shumë siguri, drejtësi, zhvillim ekonomik dhe integrim ndërkombëtar. Ajo theksoi rëndësinë e sundimit të ligjit, forcimit të institucioneve dhe krijimit të perspektivës për të rinjtë që të ndërtojnë të ardhmen e tyre në vend.

Presidentja shprehu mirënjohje për kontributin e qytetarëve, përfshirë punëtorët, policët, ushtarakët, mësuesit, mjekët, të rinjtë, gratë dhe vajzat, si dhe mërgatën, duke e cilësuar këtë të fundit si një shtyllë të rëndësishme të zhvillimit dhe përfaqësimit të Kosovës në botë.

Në fund të mesazhit, Presidentja Osmani uroi shëndet, paqe dhe begati për të gjithë qytetarët, duke shprehur besimin se viti 2026 do të jetë një vit bashkëpunimi, përgjegjësie dhe suksesi për Republikën e Kosovës.