Presion politik mbi humoristin zviceran që pranon martesën fiktive me një të huaj

Ai ka pranuar se para shumë kohësh, për shtatë vjet me radhë ka pasur një martesë fiktive me një grua të huaj lezbike, për t`i mundësuar asaj të qëndrojë në Zvicër

Aktori i njohur komik, njëri ndër humoristët kulmorë të Zvicrës, Viktor Giacobbo, pak ditë më parë ka bërë në gazetën Tages Anzeiger një pranim që ka nxitur debat të gjallë në mediat e këtushme. Ai ka pranuar (pa e pyetur kush) se para shumë kohësh, për shtatë vjet me radhë ka pasur një martesë fiktive me një grua të huaj lezbike.

Aktori, me këtë “martesë” i ka mundësuar asaj të qëndrojë në Zvicër që të mund të bashkëjetojë me partneren e saj, po ashtu lezbike zvicerane, transmeton albinfo.ch. Ato jetonin së bashku prej 30 vjetësh, por pasi që nuk kishin të drejtë të martoheshin si partnere të gjinisë së njëjtë, lezbikes së huaj i duhej që vazhdimisht të lëshonte Zvicrën për periudha të gjata. Pas “kurorëzimit” me Giacobbo-n, ajo mund të qëndronte legalisht në Zvicër. Martesa fiktive ka zgjatur shtatë vjet dhe pastaj “çifti” është shkurorëzuar, me marrëveshje.

Duke qenë se martesat fiktive 8 vjet pas prishjes nuk janë më të dënueshme, ose vjetërsohen, Giacobbo e ka bërë publik lajmin pasi ka kaluar fazën e rrezikut, përcjell albinfo.ch. Por, në rast se kjo martesë do të zbulohej më herët, ai mund të dënohej me burg deri në 5 vjet.

Ndërkohë që juristët “e lirojnë” nga përgjegjësia penale, disa politikanë kërkojnë përgjegjësi ose dënim që, sipas tyre, shkon deri në marrje të pasaportës zvicerane që tashmë e zotëron ish-partnerja fiktive e komikut të njohur. Deputeti nacional nga  SVP,  Claudio Schmid, kërkon “sqarim të plotë” të rastit.

“Autoritetet për migracion duhet t`ia marrin pasaportën dhe ta anulojnë në mënyrë retroaktive natyralizimin si pasojë e mashtrimit të bërë”, ka shkruar ai në Tweeter. Ai ka shtuar se përkundër vjetërsimit të lëndës, duhet kërkuar një sqarim i hollësishëm i rastit. Schmid ka vërtetuar për gazetën Blick se do të bëjë një mocion në Parlament lidhur me rastin.

Ndërkaq përgjigjja e humoristit, po ashtu përmes Tweeterit ka qenë: “Më gëzon (kërkesa për sqarim”. Por a e di ai se tashmë ish “gruaja” ime, si një ndërmarrëse e suksesshme, ka krijuar vende pune për zviceranët, ka paguar kontribute sociale dhe bashkë me mua ka paguar edhe dënimin martesor”.

(Foto: Screenshot SRF)

---