Produktet e prodhuara në Kosovë, më të shtrenjta se ato të importuara

unsplash

Prodhimet vendore dalin shpesh të jenë me çmim si ato të importuara, ose më të shtrenjta. Sheqeri është më i shtrenjtë se ai i importuari, salca po ashtu, edhe pecetat, shkruan Radio Evropa e Lirë.

“Nuk e di pse… por mendoj se produktet vendore do të duhej të ishin më të lira”, thotë Ndue Kalaj, një banor në Prishtinë. Vebi Mjeku thotë se blen pak produkte vendore – vetëm nëse janë më të lira. “E shikoj edhe cilësinë, por më shumë çmimin”, thotë ai për Radion Evropa e Lirë, përcjell albinfo.ch.

Përfaqësues të bizneseve dhe të kompanive prodhuese në Kosovë thonë se çmimet ndikohen nga politikat fiskale. “Referuar shteteve përkatëse – Serbisë, Maqedonisë së Veriut e të tjera – ato kanë politika të avancuara fiskale dhe kompanitë e tyre kanë subvencionime të ndryshme nga shteti. Këto politika që ata i kanë, na penalizojnë, sepse ne nuk i kemi”, thotë Isa Rakovica, drejtor i shitjes në kompaninë “Liri” në Prizren, e cila merret me prodhimin e produkteve të ndryshme ushqimore.

Ai shton se punon me një marzhë të vogël fitimi.  Problemet me politikat fiskale i konfirmojnë edhe në Odën Ekonomike të Kosovës. “Energjia elektrike për prodhuesin në Kosovë nuk është e subvencionuar, ndërsa në vende të tjera kanë lehtësira. Në disa vende prodhuesit janë të liruar edhe nga tatimet për ambalazhe, ndërsa në Kosovë nuk janë”, thotë Rafuna për Radion Evropa e Lirë, përcjell albinfo.ch.

Ai sugjeron që të ketë zbritje të tatimit mbi vlerën e shtuar ose atij doganor.

Kosova importon shumicën e produkteve nga shtetet fqinje dhe ato të Bashkimit Evropian, edhe pse ka rreth 2.400 kompani prodhuese.

Gjatë vitit të kaluar, si konsumatorët, ashtu edhe prodhuesit i ka goditur edhe inflacioni i lartë. Kosova e ka mbyllur 2022-shin me normë mesatare të inflacionit gati 12 për qind, shkruan Radio Evropa e Lirë, përcjell albinfo.ch.